CUI-LUCUS: Supervisión remota de flotas de drones en tempo real. Desde calquera lugar.

En Sixtema, encántannos os desafíos, especialmente aqueles que nos impulsan a construír o futuro. Unha das viaxes máis apaixonantes que emprendemos foi o proxecto CUI-LUCUS, unha aventura tecnolóxica que iniciamos en 2024 e que seguimos percorrendo con orgullo xunto a Airbus.

Este proxecto enmárcase na Civil UAVs Initiative (CUI), a aposta estratéxica da Xunta de Galicia para situar a Galicia como polo de referencia no desenvolvemento de solucións con vehículos aéreos non tripulados. Tras a nosa participación nas fases A e B, avanzamos agora con CUI-LUCUS na fase C, sumando experiencia e capacidades no ámbito da xestión intelixente de misións UAV.

O obxectivo desta nova etapa é claro: desenvolver unha plataforma Ou-Cloud de uso civil para a xestión, operación e administración de misións comerciais con drons. Unha solución pensada para facilitar a supervisión remota de frotas UAV de forma segura, escalable e en tempo real.

Tecnoloxía cloud para supervisión global

Desde o principio, a meta foi ambiciosa: como poderiamos supervisar o que ven e rexistran varios drons ó mesmo tempo, en tempo real e desde calquera lugar do mundo, de forma sinxela e segura?

A nosa solución inclúe un sistema avanzado que permite recibir vídeo en alta definición e datos de telemetría (como posición, velocidade ou altitude) de múltiples misións simultaneamente. Calquera operador autorizado pode acceder a toda a información en tempo real desde o seu computador, estea onde estea.

Para facelo posible, desenvolvemos unha arquitectura cloud baseada na infraestrutura de Amazon Web Services (AWS), que garante robustez, escalabilidade e seguridade mesmo en escenarios con alto volume de transmisión. Así, os datos están sempre dispoñibles e protexidos, independentemente do número de drons conectados.

Unha colaboración de altura con Airbus

Percorrer este camiño xunto a Airbus é todo un privilexio e un selo de calidade. Que un referente global no sector aeronáutico confíe no noso talento e a nosa visión para un proxecto tan estratéxico é o mellor recoñecemento ó noso traballo, e sitúanos á vangarda do sector.

Ademais, contamos coa colaboración do Centro Avanzado de Tecnoloxías Aeroespaciais (CATEC), un centro tecnolóxico de referencia que achega coñecemento crave para establecer a comunicación cos UAVs. A súa experiencia complementa e reforza o desenvolvemento da nosa solución, altamente innovadora e aliñada cos estándares máis esixentes do sector.

O proxecto CUI-LUCUS é un reflexo do que somos capaces de facer: transformar ideas complexas en solucións potentes e fiables.

Aprende máis sobre o proxecto, o noso papel e o dos nosos socios no seguinte vídeo.